Nefyn ar ei orau

Bydd y ddreif ddelfrydol yn ffafrio ochr chwith y llain deg sy’n goleddu o’r chwith i’r dde yn raddol; trwy gyflawni hyn gall y golffiwr anelu ei ail ergyd am y lawnt, sydd fel maes glanio yn y pellter, gyda’r môr yn gefndir. Gall bêl ar grwydr lanio mewn pyllau tywod ar y chwith a’r dde.

Dyma dwll tro cam i’r dde, o amgylch traeth cerrig Borthwen, lle y gellir dewis chwarae’n ddiogel i’r chwith gydag ail ergyd hir, neu dderbyn y sialens o gamu’r bêl dros ochr y clogwyn a manteisio ar ergyd fer i’r lawnt.

Par 3 lle yr ergydir i fyny gallt o di a leolir ar bentir cul. Caiff y lawnt hir ei amddiffyn gan byllau tywod, yn arbennig ar y dde.

Bydd y mwyafrif llethol o chwaraewyr, ar wahân i’r dewraf a’r colbwyr pellaf, yn taro haearn i waelod yr allt yma, gan adael ergyd fer i’r lawnt ar ben yr allt. Bydd y traeth neu’r llanw’n disgwyl yn eiddgar am beli sydd ar grwydr!

Twll mentro i gael eich gwobr go iawn! A’r risg – cynnig taro’ch pêl dros ddau gan llath ar draws cilfach er mwyn cael ail ergyd fer i lawnt a leolir yng nghanol creigiau. Fel arall, cewch daro i’r dde a wynebu ail ergyd llawer hirach.

Twll par 3 byr a chwaraeir o di sydd wedi’i leoli ar graig uchel ger Gorsaf Gwylwyr y Glannau i lawnt sy’n rhedeg oddi wrth y golffiwr tua’r môr. Petaech yn gor-daro, gallai eich pêl lanio ar do Cwt y Bad Achub!

Twll par 3 a chwaraeir gyda haearn hir neu fyr - yn ddibynnol ar y prifwynt. Bydd ergydion sy’n fyr yn glanio yn y mordwll o’ch blaen ac ergydion a sleisir yn diflannu i’r ‘golch’ ar y dde!

Twll par 5 trawiadol. Unwaith eto, mae’r ti’n gogwyddo ar glogwyn y môr a rhaid wrth ddreif ac ail ergyd hynod gywir ar hyd llain gul o dir gyda’r môr ar y dde a gwellt garw ar y chwith.