Cartref >> Cwrs Golff >> Cyflwyniad a Ffurfwedd y Cwrs

Cyflwyniad a Ffurfwedd y Cwrs

“Diferyn yn y Dafarn”

Sawl clwb allai frolio y’i sefydlwyd mewn bar tŷ tafarn bychan, anghysbell ar draeth diarffordd yng nghanol arfordir garw gyda chadwyn o fynyddoedd byd enwog yn gefndir iddo?

Wel, gall Clwb Golff Nefyn a’r Cylch ateb y galwad yma. Erbyn heddiw, gall golffwyr sy’n ymweld â’r Clwb gael egwyl fechan wrth chwarae ar Benrhyn Porthdinllaen a mwynhau’r croeso a estynnir iddynt yn Nhafarn Tŷ Coch ar Benrhyn Llŷn, yn union fel y gwnaeth sylfaenwyr y Clwb dros ganrif yn ôl.

Nefyn - golygfa o’r môr o bob twll a chornel”

Mae gan ymwelwyr, sy’n chwarae ar gwrs Nefyn, y dewis o chwarae’r Hen Gwrs neu’r Cwrs Newydd fel rhan o’r 26 twll sydd ar gael. Fodd bynnag, fe’i hanogir i neilltuo amser i chwarae’r ddau gwrs yn ystod eu hymweliad.

Ar yr Hen Gwrs, chwaraeir y deg twll gwreiddiol cyntaf cyn troi at Benrhyn Porthdinllaen i chwarae’r wyth twll olaf. Yn dilyn y twll cyntaf, a chwaraeir allan at y môr, ceir cyfres o 3 twll sy’n dilyn yr arfordir creigiog hyd at Abergeirch, tyllau anodd lle gwobrwyir y dewr a chosbir y person petrusgar. Dilynir yr her yma gyda thwll byr lle bydd eich cefn at y môr a chyfle i gael eich gwynt yn ôl! Mae wyth twll olaf o’r Hen Gwrs ar benrhyn cul (Y Point fel yr adweinir ef), lle chwaraeir ar leiniau a lawntiau uwchlaw’r môr, gyda phentiroedd creigiog a chilfachau ar yr un ochr a thraethau tywod ar y llall.

Chwaraeir y deg twll cyntaf gwreiddiol eto wrth gychwyn ar y Cwrs Newydd, ond yna dilynir hyn gydag wyth twll cymharol newydd sy’n dilyn llethrau tawel a chilfach yr afon Geirch. Mae cryn her i’r golffiwr ar y tyllau yma, gyda’r sialens eithaf ar y 15fed twll -par 4 sy’n troi o’r dde i’r chwith gyda thywod mewn mannau strategol; mae cywirdeb yn hanfodol yma. Gydag Eryri yn gefndir i bob twll, daw’r uchafbwynt ar y ti olaf un, gyda golygfa banoramig o’r holl gwrs.

BOOKINGS & INFORMATION:

Book a Tee Time
Email via the Website
Professional Shop: 01758 720102
Office: 01758 720966 (Ext 5)